Grímannsfell frá Bringum

Fjölbreytt hlaupaleið á Grímannsfell, hæsta fjall í landi Mosfellsbæjar (482 m y.s.). Hlaupið hefst við bílastæðið við Bringur og er fyrst stefnt að Helgufossi eftir stikuðum stígum. Þaðan er hlaupið upp með Köldukvísl og farið yfir nokkrar sprænur áður en komið er að brattasta kaflanum efst. Leiðin er fremur þægileg að hlaupa en tekur svolítið á í mesta brattanum. Hæsti hluti fjallsins nefnist Stórhóll og þaðan er glæsilegt útsýni yfir Hellisheiði, Mosfellsheiði, Esjuhlíðar og höfuðborgarsvæðið. Leiðin er hringur, tæpir 6 km, og undirlagið er blandað með mold, melum, grasi og votlendi á köflum. Það getur verið bleyta og mýrlendi upp við Grímannsfell nema í þurrkatíð. Hlaupið er til baka niður og mikilvægt er að fara varlega í bröttum og lausamöl á köflum.