Hjarta Hafnarfjarðar

Gönguleiðin hefst við strandstíginn í Hafnarfirði með útsýni yfir höfnina. Meðfram sjónum má njóta náttúrunnar og lífsins við hafið áður en leiðin beygir upp að Hellisgerði, töfrandi garði með hraunmyndunum, mosavaxinni náttúru og fallegum göngustígum sem minna á ævintýraheim. Frá Hellisgerði liggur leiðin áfram í gegnum gamla bæinn með sínum litríku timburhúsum. Gengið er framhjá Byggðarsafni Hafnarfjarðar, sem veitir innsýn í daglegt líf fyrr á tímum, Fríkirkjunni og Hafnarfjarðarkirkju. Leiðin liggur einnig í gegnum miðbæ Hafnarfjarðar með skemmtilegum verslunum og kaffihúsum. Á gönguleiðinni eru einnig nokkur skreytt hjörtu þar sem tilvalið er að staldra við. 

Fyrir þau sem vilja lengja gönguna er hægt að taka auka hring að Víðistaðatúni, sem er skemmtilegt útivistarsvæði fyrir fólk á öllum aldri. Einnig er hægt að labba hringinn í kringum Lækinn og að gömlu rafstöðinni, eða labba upp að Hamrinum og njóta útsýnis yfir Faxaflóa.