Búrfellsgjá

Búrfellsgjá er 3,5 km löng hrauntröð sem liggur vestur úr Búrfelli og varð til í eldgosi fyrir um 7.000 árum. Tilvalið er að hefja hjólatúrinn á bílastæði við Heiðmerkurveg suðaustan við Vífilsstaðahlíð í Garðabæ. Þar er gott skilti sem lýsir leiðinni og helstu kennileitum. Hjólað er eftir stígnum í gjánni og fram hjá litlum hellum sem gaman er að skoða. Við enda gjárinnar er Búrfellið sjálft, fallegur gjallgígur. Þaðan er stórkostlegt útsýni til allra átta. Leiðin liggur svo eftir stíg aftur niður og er sama leið hjóluð til baka að bílastæðinu.