Garðabæjarhringur

Þessi leið hefst við Vídalínskirkju en tilvalið er að byrja eða enda hjólaferðina á því að skoða Minjagarðinn að Hofsstöðum. Þar var grafið niður á næststærsta landnámsskála sem fundist hefur á Íslandi. Hjólað er eftir íbúðargötum og fram hjá Holtstúni þar sem Sankti Jósefssystur bjuggu fram til ársins 1998. Haldið er áfram og yfir brúna yfir Reykjanesbraut. Á leiðinni upp að Vífilsstaðavatni má sjá Vífilsstaði en þar var berklahæli starfrækt frá 1910 þar til berklaveikin var að mestu kveðin niður um miðja 20. öld. Haldið er áfram í áttina að Vífilsstaðahlíð og þaðan að Urriðaholti. Hjólað er á Flóttamannaveginum áður en komið er inn á stíginn við Urriðaholt. Farið er yfir brúna sem liggur yfir Reykjanesbraut hjá Kauptúni og að stíg sem liggur í gegnum úfið Garðahraunið. Síðan er hjólað upp Flatirnar og aftur að Vídalínskirkju þar sem ferðin hófst.