Helgafell í Hafnarfirði

Helgafell við Kaldárbotna í Hafnarfirði (338 m y. s.) er afar vinsæl gönguleið. Hægt að fara fleiri en eina leið upp á fjallið, en sú sem er mest farin hefst við nýtt og vel merkt bílastæði við Kaldárbotna. Þaðan sést stígurinn að fjallinu greinilega. Gengið er fram hjá vatnsbólum Hafnfirðinga í Kaldárbotnum og svo áfram þar sem greinilegar vörður leiða að uppgöngunni á fjallið. Leiðin upp er nokkuð brött, einkum í byrjun þegar gengið er upp lítið og grunnt gil upp á næsta hjalla fyrir ofan, en þó fremur auðveld. Helgafell er móbergsfjall sem myndaðist við eldgos undir jökli seint á síðustu ísöld. Undirlagið er fast undir fæti og þægilegt til göngu, en fyrir vikið er erfitt að móta skýran stíg upp fjallið. Leiðin er samt nokkuð greinileg og vörður eru á nokkrum stöðum til þess að vísa veginn. Þegar komið er upp blasir við stórkostlegt útsýni í allar áttir og hægt að átta sig á því sem fyrir augu ber með hjálp útsýnisskífu. Áður en gengið er niður er góður siður að skrifa nafnið sitt í gestabókina sem þarna er. Gengið er til baka sömu leið og farin var upp og er mikilvægt að vara sig á lausum steinum eða möl, sérstaklega þegar farið niður gilið.