Hobbitastígur og Vífilsstaðahlíð

Þessi vinsæla utanvegahlaupaleið liggur um Vífilsstaðahlíð í Garðabæ, eitt fjölbreyttasta útivistarsvæði bæjarins. Leiðin hefst við enda Vífilsstaðahlíðar. Þaðan er hlaupið framhjá Maríuhellum, um svokallaðan Hobbitastíg, sem hlauparar á svæðinu þekkja vel og inn á skógi vaxna hlíðina á móts við háspennulínuna. Undirlagið er að mestu þjappaðir moldarstígar og góðir malarstígar, líkt og víðast hvar á þessum slóðum, og hentar vel til hlaupa. Leiðin er um 8 km hringur með hóflegri hækkun, alls um 95 metrum. Vífilsstaðahlíð er skjólsæl og gróin og því kjörin í hvassviðri. Hægt er að tengja leiðina við lengri hringi, til dæmis um Urriðakotshraun og áfram að Búrfellsgjá. Garðabær hefur byggt upp góða aðstöðu á svæðinu með bílastæðum, bekkjum, fræðsluskiltum og kortum við aðkomu. Á sumardögum er nokkur umferð á stígunum, bæði gangandi og hjólandi, og rétt að sýna aðgát. Þar sem svæðið er að hluta friðland ber að ganga vel um náttúruna; hundar eru bannaðir í friðlandinu um varptímann.