Öskjuhlíð

Öskjuhlíð er einstakt útivistarsvæði í nágrenni miðborgarinnar með fjölbreyttri náttúru og áhugaverðum söguminjum. Um Öskjuhlíðina liggja fjölmargir stígar sem skemmtilegt er að ganga um. Þessi göngu- eða hlaupaleið um Öskjuhlíðina er 6,7 km hringur sem kallast Bakgarðshringurinn og hefst við Mjölnisheimilið. Farið er um skemmtilega stíga utan í Öskjuhlíðinni, göngustíga meðfram henni og niður í Nauthólsvík. Öskjuhlíðin sjálf er áhugavert útivistarsvæði með fjölbreytilegu náttúrufari, merkilegum jarðminjum, einni þéttustu skógrækt í Reykjavík og einstökum mannvistarminjum frá stríðsárunum. Öskjuhlíðin er afar vinsælt útivistarsvæði sökum nálægðar sinnar við miðborg Reykjavíkur, háskólasvæðið í Vatnsmýrinni, útivistarsvæðin í Nauthólsvík og Fossvogi og fjölmenn hverfi eins og Bústaðahverfi og Hlíðar.