Seltjarnarnes og golfvöllur

Á Seltjarnarnesi má finna góða hjólastíga sem liggja um falleg náttúrusvæði. Þessi 7,5 km hringur liggur meðfram Seltjarnarnesinu og golfvellinum og hefst ferðin við bílastæðið hjá Gróttu. Þaðan er hjólað á stígnum sem liggur meðfram sjónum og Bakkatjörn í átt að golfvellinum, syðst á nesinu. Þar liggur leiðin inn á malarstíg sem þræðir ströndina hjá golfvellinum. Síðan er farið inn á malbikaðan stíginn við suðurströnd Seltjarnarness og hjólað austur nesið, fram hjá sundlauginni og yfir Nesið hjá Eiðistorgi. Þegar komið er inn á stíginn sem liggur norðan megin Nessins er beygt til vinstri og hjólað í áttina að Gróttu þar sem ferðin endar. Þetta er einstaklega falleg leið og skemmtileg að hjóla til að mynda á sumarkvöldum.