Skógarhringurinn í Heiðmörk

Skógarhringurinn í Heiðmörk er ákaflega skemmtileg og fjölskylduvæn gönguleið. Leiðin er vel merkt grænum stikum og er 3,5 km að lengd. Á leiðinni er Furulundur sem er fjölskyldulundur búinn leiktækjum, blakvelli og grillaðstöðu. Inn af Furulundi er Dropinn, áningarstaður með grilli, borðum og bekkjum. Annar fjölskyldulundur á þessari leið er Grenilundur en þar er grillaðstaða sem og leik- og klifurtæki. Tilvalið er því að ganga þennan stutta hring og taka með sér nesti og gera sér glaðan dag í skóginum. Heiðmörk er í umsjón Skógræktarfélags Reykjavíkur sem eru frjáls félagasamtök. Nánari upplýsingar má finna á heidmork.is.