Vatnahringurinn í Heiðmörk

Í Heiðmörk er að finna ótal göngustíga í dásamlegu umhverfi og leiðirnar eru vel merktar. Vatnahringurinn er 7,5 km göngu-, hlaupa- eða hjólaleið í Heiðmörk sem er merkt með bláum stikum. Á bíl er ekið inn í Heiðmörk eftir Rauðhólavegi frá Suðurlandsvegi. Hægt er að leggja á bílastæðinu við Helluvatn eða við Borgarstjóraplan. Fleiri bílastæði er einnig að finna í Heiðmörk. Á þessari leið er gengið fram hjá Elliðavatni og nokkrum minni vötnum eins Helluvatni, Hraunhúsatjörn og Myllulækjatjörn. Fræðsluskilti með ýmiss konar fróðleik um fugla, plöntur, tré, jarðfræði og sögu svæðisins hafa verið sett upp af Skógræktarfélagi Reykjavíkur á leiðinni og eru skiltin prýdd fallegum teikningum. Heiðmörk er í umsjón Skógræktarfélags Reykjavíkur sem eru frjáls félagasamtök. Nánari upplýsingar um svæðið má finna á heidmork.is.