Varmá og Álafosskvos

Álafosskvosin er heillandi svæði sem gaman er að heimsækja. Húsin eru frá ýmsum tímaskeiðum og við bakka Varmár stendur gamla sundlaugarbyggingin sem er ein sú elsta á landinu. Stígar liggja um svæðið og Álanesskóg sem er einn elsti trjáreitur Mosfellsbæjar. Álafossinn er fallegur foss í Varmá sem liðast í gegnum Álafosskvosina. Varmá og Álafossinn eru á náttúruminjaskrá en þar hófst ullariðnaðarævintýri í kringum aldarmótin 1900 og var vatnsaflið úr ánni nýtt til þess að knýja vélar vefnaðarverksmiðjunnar. Áin er ylvolg og vinsælt var að stinga sér til sunds í uppistöðulóni virkjunarinnar og sjá má leifar af gömlum stökkbrettum við ána. Vinsælt er að heimsækja svæðið en mikilvægt er að fylgja stígum og merktum leiðum.